Një gyp i gjatë disa metra, e me plot mbishkrime, është vendosur përgjatë urës ‘Mihlet Bahqe’ në qendër të Pejës.

Një aktivitet i tillë është organizuar të shtunën nga Shoqëria Civile, si aksion për kundërshtimin e çdo nisme për ndërtimin e hidrocentralit në Lumbardh, raporton KTV.

Slogane si ‘Ta ruajmë lumin para se të jetë tepër vonë’ ; ‘Qytetarët humbin lumin, investitori përfiton miliona euro’, e të ngjashme, janë vendosur përgjatë këtij gypi.

Ndërtimi eventual i hidrocentralit në Lumbardh, sipas organizatorëve të këtij aksioni, do të shkatërronte Lumbardhin, lumë i cili është një nga bukuritë që e identifikon Pejën.

Në ndërkohë, po vazhdon nënshkrimi i peticionit kundër hidrocentraleve që më pas, do të dërgohet në kuvend.

“Kelkos Energy” është kompania e kontraktuar nga Qeveria, e cila është thënë se do të investojë rreth 97 milionë euro për ndërtimin e pesë hidrocentraleve.